اللي ملهمش فيها..الجزء الاول

كتب/هبة يوسف

مُتع الحياه كتيرة .. بس زى مُتعِة الكورة .. ما تلاقيش ..

و بِناءً عليه .. ففهم الكورة و الإستمتاع بيها .. هو حق مكفول للجميع ..

فرحِتك بجول الفوز فى الدقيقه الأخيرة واللى هيخليك نايم مبسوط و صاحى مُقبِل على الحياه .. حُزنك على بطوله ضاعت من فريقك ويدخلك فى دور إكتئاب يا عالم يخلص إمتى ؟! .. كلها أحاسيس حقيقيه مش هتعيشها إلا لو كنت ليك فى الكورة ..

على فرض إنك مالكش فيها .. ده مش معناه إنك تفقد الأمل .. لسه قدامك فُرصة إنك تِفهم كل صغيرة و كبيرة فى عالم الكورة العبقرى و تستمتع بكل أحاسيسها اللى مش هتعيشها إلا لو ليك فيها .. كل ده بشرط إنك .. تركز كويس فى الكلام الجاى ..

أولاً فى كام معلومه فى السريع كده نبدأ بيهم و هم :

–        إختلف المؤرخون حول بداية نشأة كرة القدم .. هيرودوت اللى زار مصر عام 460 ق.م لقى المصريين القدماء بيلعبوا بكرة مصنوعه من جلد الماعز أو القش و مؤرخيين غيره نسبوا كرة القدم للإغريق و اليونانيين و الصينيين القدماء ..

و إذا كان الخلاف شديد حول النشأه الأولى للكرة .. إلا أن كرة القدم الحديثه ظهرت فى إنجلترا عام 218 م .. وقتها لعبها الإنجليز إحتفالاً بإنتصارهم على كتيبة رومانية من الغُزاه ..

–        هنبدأ من تحت الصفر و نتكلم على فريق كرة القدم اللى بيتكون من 11 لاعب و 7 إحتياطى .. و بيكون من حق المدرب تغيير 3 لاعيبه بس أثناء المباراه ..

–        المباراه مدتها 90 دقيقه .. مقسمين ل 45 دقيقه شوط أول .. و 45 دقيقه شوط تانى .. ده غير إن فى 15 دقيقه إستراحه بين الشوطين.. و من حق الحكم إحتساب وقت بدل ضايع فى كل شوط .. ده فى حالة توقف المباراه لعلاج لاعيب أو توقف المباراه لأى سبب من الأسباب ..

–        بالنسبه لحُكام المباراه اللى بيكون عددهم 4 حُكام .. مقسمين كالتالى : الحكم الأول – إتنين مساعدين – حكم رابع ..

طيب ايه لازمة ال 4 حُكام دول ؟! .. هقولك حالاً ايه لازمتهم ..

الحكم الأول : هو الكبير بتاع الماتش و بيكون متحكم فى كل القرارات و مش من حق حد الإعتراض على قراراته و بيكون من حقه طرد أو إنذار اللاعيب أو الجهاز الفنى أو حتى إلغاء المباراه .. وهو المُتحكِم فى إحتساب الوقت بدل الضايع و الأهداف … إلخ

الحكام المساعدين ” حُكام الرايه ” Linesmen : بيكون مكانهم على الخطين اللى موجودين على جانبى الملعب .. و من إسمهم باين إنهم بيساعدوا الحكم الأول فى إحتساب قرارات معينه .. – ولكن القرار النهائى للحكم الأول – .. و بيكونوا واقفين على خط واحد مع اخر مدافع من كل فريق ..

الحكم الرابع : ده الحكم اللى لو إتفرجت على أى ماتش هتشوفه هو اللى بيرفع اللوحه المكتوب عليها الوقت بدل الضايع اللى حسبه الحكم الأول فى نهاية كل شوط .. و بيكون له مهام إداريه أكتر .. بجانب إنه مسئول عن خروج اللاعيب المطرود خارج الملعب و بيتأكد إنه مش قاعد مع البدلاء أو إنه لسه موجود فى الملعب ..

هو حكم إحتياطى للحكم الأول .. يعنى فى حالة إصابة الحكم الأول مثلاً .. يحل محله الحكم الرابع

(إشارات الحكم الأول )

(إشارات حُكام الرايه ” المساعدين”)

هاه لسه مركِز ؟! ..

حلو أوى زى الفُل .. خليك مركِز كده عشان هندخل فى الجد ..

لا هو كل اللى فات ده كان هزار ؟!

لا يا معلم بس ده كان مجرد مقدمه علشان أكلمك بالتفصيل شويه عن ملعب الكورة

أبعاد الملعب :  طوله 120 متر .. و عرضه 90 متر ..

و بيتكون من :

خط التماس :Touch Line

هو الخط الممتد على جانبى الملعب بالطول.. بمعنى أصح هو حدود الملعب الطوليه.. ولو الكورة خرجت بره الخط ده .. بنرجع الكورة تانى للملعب من خلال تنفيذ حاجه إسمها ” رمية التماس ” وهنتكلم عنها قدام شويه ..

خط المرمى Goal Line :

و هو الخط العرضى للملعب .. و بمعنى تانى هو حدود الملعب بالعرض .. ولو الكورة خرجت بره الخط ده من الفريق الخِصم بنرجع الكورة تانى للملعب عن طريق ” ركلة ركنيه “..

و فى حالة لو الكورة خرجت بره الخط ده و ماحدش من الفريق المنافس لمسها.. ساعتها بترجع الكورة للملعب عن طريق ” ركلة مرمى ” ..

خط النُص Halfway Line :

هو الخط اللى بيقسم الملعب بالعرض لنصين متساويين .. و الخط ده لازمته حاجتين :

–        بيفصل بين لاعيبة الفريقين فى بداية المباراه و هم ” بيسنتروا “

–        حكم الرايه بيقف عنده و مابيرجعش بعده علشان مافيش تسلل بيتحسب قبل خط النُص .. و طبعاً إنت مش فاهم حاجه من الكلام ده .. بس أوعدك لما نييجى نتكلم عن التسلل هتفهم

دايرة السنتر Center Circle :

بتكون موجوده فى نُص الملعب و بيتلعب منها ركلة البدايه .. 2 لاعيبه بس اللى مفروض يكونوا جوه الدايرة دى أثناء تنفيذ أى عملية سنترة .. واحد يحرك الكورة و التانى يستقبلها ..

منطقة الجزاء Penalty Box :

و ده الصندوق أو المستطيل اللى بيكون موجود فى نهاية كل جهه من الملعب .. و لو فى لاعيب موجود فى المكان ده و معاه الكورة و رايح على المرمى .. ولاعيب من الفريق الخِصم لمسه أو عرقله .. هنا تتحسب ضربة جزاء لصالح اللاعيب اللى كان معاه الكورة و رايح يحرز هدف

نقطة الجزاء :Penalty Spot

و هى دايرة صغيرة بتكون جوه منطقة الجزاء و بتتنفذ منها ضربات الجزاء و ركلات الترجيح .. و موجوده على بُعد 11 متر من المرمى

قوس منطقة الجزاء Penalty Arc:

و هو عبارة عن نُص دايرة بتكون موجوده على حدود منطقة الجزاء .. و أثناء تنفيذ ضربات الجزاء ممنوع على أى لاعيب إنه يتواجد جوه القوس ده .

صندوق المرمى Goal Box:

هو صندوق صغير بيكون موجود جوة منطقة الجزاء .. و بيسمى برضو بمنطقة ال ” 6 ياردات ” .. و ضربة المرمى بتتنفذ من أى نقطه موجوده فى الصندوق ده

قوس الركنيه Corner Arc :

ربع دايرة بيتم تنفيذ الضربه الركنيه منه .

الي اللقاء في الجزء الثاني لنتحدث فيه عن مراكز اللاعيبة والفرق بينهم..

للتواصل مع الكاتب @Hebatu_Allah